曼城皇马大火併
曼城神锋 史达宁
争晋级唔打守势波
夺得欧联锦标次数最多嘅皇家马德里，今晚欧联16强次回合作客曼城。皇马首回合落后1比2，唔想畀一支从未攞过冠军嘅球队淘汰，次回合作客一定会採取主动，施丹带队欧联作客劲旅唔会龟缩，而且佢哋近15场欧联两回合淘汰赛全开3球或以上，2.5球入球大热得有道理。
呢个球员总身价超过200亿港元嘅对碰，皇马喺首回合凭艾斯高先打开纪录，但曼城靠加比尔捷西斯及奇云迪布尼连下两城，领先2比1嚟到次回合。形势上皇马冇得谂，今场一定要攻，好彩嘅係「银河舰队」主帅施丹一向唔怕喺作客情况下同强队对攻，前届皇马喺佢带领下高举「大耳朵盃」，淘汰赛阶段作客先后以2比1击败巴黎圣日耳门、8强赠祖云达斯3蛋，以及4强2比1击败拜仁慕尼黑。
皇马队长沙治奥拉莫斯停赛，后防嘅华拉尼、艾达米列达奥同丹尼尔卡华积回防速度不及曼城几名中前场球员，因此施丹需要利用前场攻击能力，减低对后防压力，夏萨特、卡斯米路及却奥斯都有相当用波能力，尤其曾经效力车路士嘅夏萨特对曼城后防相当熟悉，肯定会为曼城后防带嚟麻烦。
银河舰队欧联旺入波
曼城形势上佔一定优势，但只要今仗畀皇马攻入第1球，成个局面会完全改变，所以面对攻力强横嘅皇马，曼城集中防守未必有着数。今仗「蓝月亮」主帅哥迪奥拿会继续起用首回合两名入球功臣之馀，具速度及射术嘅边路球员史达宁同马列斯亦会正选上阵，一于同皇马死过，加上皇马近15场欧联两回合淘汰赛，全开3球或以上，今场肯定係一场入球骚，诚意推介中位数2.5球入球大。
