全方位开火轰费伦国米半场主胜掂
今晚意甲焦点战，2哥国际米兰主场迎战「紫百合」费伦天拿。国米近期表现回勇，先后击败拖连奴、史帕尔及赛和罗马，火力全开，卢卡古再破入球纪录，加上主场惯性速食「紫百合」，直取半场主胜。
国米近期火力全开，得分点分布甚广，例如对拖连奴及史帕尔嘅7个入球之中，分别由7位球员射入，包括一直备受批评嘅「A山」阿历斯山齐士，都喺对史帕尔一役顶入1球及贡献1次助攻，佢复赛后交出7次助攻，愈踢愈有信心。随住「A山」弗番，令国米锋线正选竞争加剧，即使卢卡古及拿达路马天尼斯都唔敢偷懒，好似上仗作客罗马，卢卡古后备落场末段射入12码扳平，亦係佢今季联赛第21个士哥，其中13球来自客场，令佢成为首位喺意甲首季作客攻入13粒嘅球员，非常争气。
紫百合遇强即谢
另一边厢，费伦今季大部分时间喺联赛榜中下游浮沉，由于护级压力唔大，抢分决心唔及力争亚军嘅国米。事实上，费伦今季联赛经常遇强脚软，包括作客输畀祖云达斯、拉素，甚至喺主场亦输畀罗马、阿特兰大及拿玻里3支强队。加上国米近4次主场对「紫百合」赢晒之馀，全部都半场领先，半场主胜有买趁早。
