狮吼士气盛赢德
新帅来头唔嘢少
今午澳职独脚戏，布里斯班狮吼中立场迎战阿德莱德联。虽然英格兰名将科拿喺停摆期间离开狮吼，好彩狮吼今季表现远胜阿德莱德联，而且新帅唔嘢少，狮吼未必会走样，主胜博得过。
喺澳职停摆前，布里斯班狮吼正值3连胜，係状态最好嘅球队。可惜经历近4个月嘅停赛期，各队都面目全非，狮吼亦唔例外，其中主帅科拿因为疫情关係上月宣布辞职，近日宣布改由禾伦穆恩执教。呢位英格兰教头本身係狮吼二队教练，亦係一队助教，熟晒班波，相信由佢「顶档」成绩唔会有太大走样。
喺阵容方面，狮吼复赛前从纽卡素喷射机撬走中场列登顿，今仗可以随时候命，另外仲有话题新兵金丹尼（Danny Kim）。呢位韩裔中场现年21岁，出身自狮吼青年军，之后转踢「兄弟球队」昆士兰狮队时表现出色，更入选年度最佳球员，同时「Danny仔」仲係现时助教戴伦戴维斯教澳洲青年军时嘅爱将，今次故剑重逢，肯定会落力演出报答戴维斯嘅知遇之恩。
阿德莱德联将帅离队
另边厢，阿德莱德联「散档」问题就大得多，首先荷兰籍主帅华碧克喺停摆期间与会方解约，现由助教华艾特顶档，同时荷兰中场米高马利亚亦都离队，最搞鬼係门将艾锡李察士，竟宣布「提早挂靴」并转战MMA，阵容可谓天残地缺。
再睇埋战绩，狮吼停摆前3场联赛全胜，相反阿德莱德联就4战全败，个阵容仲要天残地缺，加上狮吼新帅似乎比阿联新教头可靠得多，狮吼主胜分头唔错，值得一试。
