等睇皇马入球Party!
皇马大炮 宾施马
赢即封王必定疯抢
今晚西甲进入尾2一轮，其中9场波同时间开赛，夺冠在望嘅皇家马德里，继续于B队主场迪史堤芬奴球场迎战维拉利尔。皇马今仗赢波即提前封王，必定抢攻；维拉利尔亦要抢分保住欧霸席位，加上近年碰头旺大手交易，2.5球大盘可取。
皇马喺西甲复赛后表现势如破竹，即使临时弃用巴拿贝球场，搬到B队主场作赛，成绩冇跌反升，复赛后9战全胜，当中7场保持清白之身，攻守兼备，趁住死敌巴塞不断失分，依家佢哋喺榜首甩开4分，联赛剩番两轮，今仗只要全取3分，即可提早夺冠。箭头宾施马复赛后入5粒，连同「带刀侍衞」沙治奥拉莫斯，多位球员都有入波能力，为捧盃必火力全开。
维拉利尔要争欧霸
排第5位嘅维拉利尔上仗输畀皇苏，令佢哋缘尽前4，而且现时只领先基达菲同皇苏3分，欧霸席位都唔叫得稳阵。「黄色潜水艇」今季火力惊人，入球数字仅次于皇马及巴塞排联赛第3，但失球数字同样高企，复赛后曾同巴塞激战输1比4，可见遇强豁出去唔死守。两军近4次联赛交手，全开3球或以上，大家都心急抢3分，肯定会斗攻，捧2.5球嘅入球大最稳阵。
