球員上力主場瘋搶
今晚英超獨腳戲，曼城主場迎戰般尼。經過漫長停擺後，「藍月亮」上周中復賽即大炒阿仙奴，球員逐漸上番力，「助攻王」奇雲迪布尼弗到漏，箭頭阿古路亦有機會擔正，主場必食住個勢搶攻。般尼停擺前5場不敗實力唔曳，近年碰頭例演入球騷，3.5球大盤穩陣。
英超停擺3個多月，各隊都需要正式比賽嘅磨鍊，令球員回復狀態，賽會編排下曼城喺上周中補賽率先登場，最終主場3球淨勝阿仙奴，雖然初段略嫌慢熱，但及後好快入局，中場核心奇雲迪布尼亦有1球進帳，今季聯賽入球連助攻，合共貢獻咗25粒，狀態冇走樣，其他隊友亦可趁上周中場波，搶先適應閉門作賽環境。雖然曼城爭標機會名存實亡，不過稍後仲有英格蘭足總盃及歐聯等各場大戰，盡快操起絕對係好事。
阿古路擔正數胡
位處中游嘅般尼停擺前正值狀態上升階段，錄得5場不敗，如果淨計聯賽更連續7戰未輸過，當中包括擊敗李斯特城、曼聯，賽和阿仙奴及熱刺等佳績，唔講得笑，但經過漫長停擺後狀態係點，真係要落場先知。
翻查紀錄，兩軍近4次正面交鋒，曼城唔單止全部贏波，當中有3次總入球開出5球，擺明旺入球騷，「藍月亮」上仗用加比爾捷西斯擔正，今仗阿古路好大機會搶番個正選位，勢必火力全開，曼城主Ｗ熱到冇肉食，讓球盤讓得太辣亦存在風險，3.5球入球大更值博。
