曼城快攻速食阿仙奴
曼城前锋阿古路
英超劲爆重开!!
英超返嚟喇！经历咗3个多月停摆之后，英超终于喺今晚强势重开，仲上演超级重头戏，「2哥」曼城主场迎战阿仙奴！两军主帅哥迪奥拿与阿迪达分属师徒，踢法一脉相承，但论功力及手上「兵器」，哥帅梗係赢晒喇，何况近年碰头「蓝月亮」食住对手，仲经常一早入波领先，饿波咁耐更加抢缰，半场主胜有买趁早。
哥迪奥拿与阿迪达都踢过巴塞，同样崇尚传控打法及压迫风格，执教后哥帅更将呢种战术发扬光大，赢尽西甲、德甲及英超冠军。阿迪达喺2016年挂靴后出任哥帅副手，上年年尾先决定自立门户接手阿仙奴。不过阿仙奴人脚参差，尤其係防线，早前热身赛对英冠宾福特，因后衞大衞雷斯同洛贺丁连番甩辘而输2比3。除此之外，阿仙奴客场例差，今季作客联赛只得2胜8和3负，其中7仗于上半场已经落后，单计阿迪达领军后4场联赛作客，全部打和未赢过，真係巧妇难为无米之炊。
近6次交锋蓝月亮「胜胜」
曼城质素赢阿仙奴几条街，令哥迪奥拿可尽情施展其进攻打法。由于阿迪达季中离队，哥帅就搵咗启蒙老师利奴出山担任助教，绝对有利无害。「蓝月亮」射手阿古路今季持续勇态，单计联赛已有16球进帐，呢位阿根廷前锋近8次有披甲对阿仙奴嘅赛事，共轰8粒，堪称「兵工厂」剋星，若果佢再入4粒，就会超越为曼联攻入183粒嘅朗尼，成为英超史上为一支球队入波最多嘅球员，今场实搵「兵工厂」练靶。睇番两军近6次交手，曼城唔单止赢晒，仲要全部都喺上半场取得领先优势，而且停摆咁耐必饿波，「蓝月亮」随时一开波即抢攻，半场主胜更有计。
