科隆慢熱後防穿窿
德甲今輪壓軸戰，由科隆主場迎戰RB萊比錫。科隆復賽後2次主場出擊都未能取勝，上場作客更以1比3慘負賀芬咸，3場賽事皆有失波，後防欠穩，以往佢哋面對萊比錫好多時都早早失波，今季萊比錫頂級進攻組合升呢，而且要搶分保住張歐聯入場券，一開局就會喪攻，半場客勝值得留意。
雖然德甲復賽已經進入第4輪，但科隆仍然好似未入局咁，先係2場於主場出擊對緬恩斯同杜塞爾多夫都未能全取3分，缺少咗球迷吶喊助威，科隆呢2戰只能夠和波，到咗上場作客賀芬咸更加輸1比3。
保歐聯席位紅牛冇得縮
睇得出科隆防線球員入局較慢，對杜塞爾多夫同賀芬咸都係半場落後0比1，今場仲有首席中堅施巴斯坦波拿奧因上仗惡意踩人要停賽，後防漏洞更加嚴重，加上佢哋急於反彈，必然主動出擊，會有更多空位畀萊比錫盡情發揮。
萊比錫重開後3戰只贏得1場，要保住歐聯席位再冇失分空間，佢哋憑進攻效率極高而穩佔德甲前列，上仗作客終於展現超强火力，換邊前就已經轟入3球大比數領先緬恩斯，最終大勝5比0，迪姆華拿翻生對球隊好重要，相信今場肯定順住個旺勢，同樣一開波就撳住科隆嚟砌。「紅牛」近4次對科隆全部半場已經領先，當中有2場更係5分鐘已開紀錄，今仗有望延續搶韁踢法，半場客勝有買趁早。
