3年未踢过江陵主场
韩职开锣3轮后只係得番一支长胜雄师，就係衞冕嘅全北汽车。呢支韩职盟主今日作客FC江原争取4连胜，好大机会派出南非中锋韦迪维积克正选挂帅，火力够晒保证。江原近年面对全北都「冇啖好食」，格食格味道甚浓，「新主场」更加可能变成死穴，今仗可以放心捧客胜。
全北开季表现未见特别有霸气，但控制赛事同埋技术、战术能力都毋庸置疑，往往凭一击就可置对手于死地。随住南非星级前锋韦迪维积克连续2场后备入替都有好表现，今场翼锋赵圭成停赛，韦迪维积克料将正选挂帅，以其1米96嘅身高同冲撞能力，将可更有效发挥莫理斯4-1-4-1阵式嘅威力，配合埋担正嘅老大哥李东国，全北整体表现势必获得提升。
射手休战冇本钱偷鸡
江原几乎採用全本土班底出战，唯一一位外援中里祟宏今季仍未有1分钟嘅落场机会。事实上，江原今季整体演出的确不俗，但係论个人质素同战斗力，只係属于韩职中游分子，同冠军热门全北仲有一定距离。况且江原今个球季起用春川松岩体育场、江陵综合运动场两地做主场，希望扩大地区影响，吸引更多球迷。今场江原唔使坐2小时10分钟车「远征」春川市，本来係件好事，但係佢哋已经3年冇喺江陵大本营踢过比赛，同作客差无几，主场之利真係得个讲字。
最重要係江原一向遇强即屈，近11次主场迎战全北，只得1胜1和9负劣绩，今场主力前锋金承大又唔出得，想偷鸡都冇本钱，斋靠死守好难抵挡来势汹汹嘅全北，客胜必捧。
