今晚另一场德甲由科隆主场斗缅恩斯，今场係缅恩斯现任教头比尔罗斯亚倒戈之战，不过科隆季初炒咗佢之后，战绩全面冒升，近6场主场联赛只输过畀班霸拜仁，其馀5场赢晒，简单捧主Ｗ。
比尔罗斯亚季初执教科隆，头11轮联赛只得2胜1和8负排第17位，球会高层为免太迟冇得救，上年11月中就炒咗佢，由前汉堡教练基斯度接手。基斯度上任后科隆表现脱胎换骨，停摆前11场联赛攞到8胜3负，3场输波对手分别係拜仁、多蒙特及慕逊加柏，单计主场近6战赢5场，值得信赖。
缅恩斯换帅冇起色
缅恩斯头11场联赛3胜8负，咁嘅成绩换教练亦合情合理，可惜佢哋搵咗比尔罗斯亚过嚟，暂时都係冇咩大起色，未计昨晚赛事缅恩斯排喺第15位，只比尾3嘅杜塞尔多夫多4分，而且佢哋今季25场联赛输15场，只係好过包尾嘅柏达邦，今次作客睇怕凶多吉少。
