今晚欧联附加赛次回合重头戏，首回合赢1比0嘅乌克兰班霸萨克达返主场再斗法甲劲旅摩纳哥。摩纳哥今季表现突然大跌Watt，攻击线熄火系关键因素，首回合输波令佢哋今场更加难打；萨克达为保领先优势，今仗势必打守势波，2.5球嘅入球细值得捧场。
首回合萨克达凭柏特连奴初段入波先拔头筹，摩纳哥虽然略占上风，但仍未能平反败局输0比1。查实摩纳哥主帅尼高高华已采用轮换制，尤其是队长宾耶达喺头两场联赛都未有担正，日前第3轮联赛对朗斯，则让另一前锋禾兰先任后备，明显系为欧联留力，可惜宾耶达喺今届正式赛事仍未开斋，脚风欠顺，至于禾兰亦只入得1粒咁大把，连同中场发电机高路云状态一般，呢条上季令人闻风丧胆嘅攻击线哑火，令摩纳哥近6仗仅入6球，当中有5仗开2球或以下，包括近3仗输晒兼全部食白果，表现走晒样乃战绩下滑主因。
回师主场打突击
另一边厢，萨克达喺首回合靠稳健防守保住胜果，成效显著；既然摩纳哥攻力咁疲弱，呢支乌超班霸亦乐于先求稳阵，睇准机会再插佢一刀。连同上届在内，萨克达近5仗欧联只失两粒，包括上届面对皇马同国米都冇失波，防守固若金汤，今仗一定缩后嚟踢，2.5球嘅细盘有买趁早。
