今晚意甲尾场罗马主场斗费伦天拿。罗马新帅摩连奴回归意甲成为焦点，既然系「寸王」首骚梗系唔衰得，加上罗马近年食住费伦，有力赢波攞头彩，主胜值得捧场。
费伦天拿谷极唔起
摩连奴廿多载执教生涯经历起起跌跌，有乜风浪未见过，但讲到最威水嘅，就不得不提2010年率领国米勇夺意甲、意杯及欧联锦标，成为意甲史上首支「三冠王」。「寸王」近年无论喺西甲或返番英超，都畀人有「回塘」嘅感觉，今次重返意甲执教罗马，梗系想从谷底反弹。佢接手罗马后，立即签入葡萄牙同胞门将鲁尔柏迪斯奥，锐意加强防守，日前更罗致车路士箭头谭美阿巴谦，实力有增无减。
「紫百合」费伦上季已沦为中下游球队，其中19场联赛客场仅得3胜，表现差强人意，连老将列贝利都约满离队，就算有少帅伊泰利安奴上任，亦难望有起色。睇番两军近4次对赛罗马全部赢晒，明显格食格，主胜有计。
