今晚英超尾场爆发伦敦打吡，由阿仙奴主场硬撼车路士。「兵工厂」连热身赛在内3连败，信心尽失，虽然获马田奥迪加特加盟，但佢今仗肯定缺阵，队长奥巴美扬出得都未必有态；车路士首轮大胜之余，卢卡古亦好大机会作回巢首骚，必定尽显身价，客胜有计。
阿仙奴喺联赛揭幕战作客升班球队宾福特，贵价中坚宾韦特伙拍柏保路马尼，无论高空波及速度都输蚀，最终净吞两蛋。连同之前两场热身赛，分别对热刺及今仗对手车仔，阿仙奴喺呢3场伦敦打吡全部输晒，士气、信心跌落谷底。
奥巴美扬肺炎康复唔慌弗
阿仙奴日前证实，包括奥巴美扬及拿卡锡迪等4位球员早前确诊新冠肺炎，奥巴虽然报称已经好番，但勉强落场亦唔慌弗，尽管接连签入门将兰斯达尔及上季借将马田奥迪加特，不过后者未搞掂签证，今仗肯定缺阵，就算想翻身亦唔易。
车路士继早前勇夺欧超杯后，联赛首轮亦以3比0轻取水晶宫，入球功臣马高斯阿朗素及杜利奥查洛巴都唔系必然主力，可见佢哋成队都好抢缰。日前以天价9,750万镑回巢「车仔」嘅卢卡古，更无惧魔咒照拣9号波衫，今仗好大机会迎来首骚。呢位「魔兽」冲击力强，撞正「兵工厂」纸扎防线必有大把数胡机会，客胜咪错过。
