今晚德超杯上演国家打吡，上季德杯冠军多蒙特喺主场，硬撼德甲9连冠拜仁慕尼黑。虽然拜仁喺联赛揭幕战和波收场，但佢哋名副其实系「蜜蜂兵团」克星，射手罗拔利云度夫斯基每逢倒戈特别醒神，加上刚有名宿梅拿离世，今仗「帛金波」必搏尽赢波捧杯，客胜捧得过。
拜仁喺日前德甲开咧战，只能作客逼和慕逊加柏1比1，连同季前热身赛在内，新帅拿高斯文领军5场竟然未赢过，今场点都要谂计省招牌。好彩为球队扳平嘅罗拔利云度夫斯基，破纪录连续7季联赛首轮有士哥，亦系佢为拜仁上阵220场德甲累积204球，效率奇高，状态毋须怀疑。
多蒙特今季有新帅马高路斯接手，并成功留住箭头艾宁夏兰特，联赛首轮大胜法兰克福5比2，呢位挪超神锋起孖兼交出3次助攻，不过翼锋查顿辛祖终于离队转投曼联，当耶尔马伦能否代替佢仍属未知之数，而老将晓姆斯又因伤缺阵，被迫要搵韦素客串中坚，唔慌稳阵。
而且多蒙特近年患上严重「恐仁症」，双方近5次正面交锋，拜仁赢晒兼轰15粒，「蜜蜂兵团」未踢已经脚仔软，「罗拔佬」更占咗6粒，可见佢面对旧东家绝不留情。何况拜仁日前有75岁名宿梅拿逝世，呢位「轰炸机」为拜仁同德国足球贡献良多，喺呢个伤心嘅日子，拜仁上下必想捧杯以慰梅拿在天之灵，一定加多两钱肉紧，整定多蒙特冇运行，简简单单捧客胜。
