一年一度欧洲超级杯今晚喺中立场北爱尔兰举行，由上届欧联盟主车路士，硬撼欧霸杯冠军维拉利尔。「车仔」自杜曹接手后明显守强攻弱，遇上专克英超兵嘅「黄色潜艇」，今场未必赢梗，加上近年欧超杯经常喺法定时间未分胜负，不妨转捧让球客胜。
杜曹上季中途接掌车路士帅印，立刻改打343阵式，先巩固防守极速止跌，最终联赛杀上前4，更喺欧联决赛以1比0击败曼城，第二度登上欧洲之巅。「杜Sir」表明要加强锋力，尤其系今夏放走老将基奥特后，更需要一位能作支点嘅中锋，但佢哋班高层喺转会工作唔太积极，进度慢吞吞，今夏斟唔掂多蒙特神锋艾宁夏兰特，阵中嘅谭美阿巴谦亦未符合「杜Sir」要求，好可能会被卖走，就算「魔兽」卢卡古快将回巢，今仗亦未必赶及上阵，预计今场比赛仍会用无锋阵迎敌，续用「败家仔」迪姆华拿孭飞，攻力未见提升。
黄色潜艇唔赦英超兵
维拉利尔喺「欧霸之王」艾美利带领下，上届首度勇夺欧霸杯，今届阵容未有大变，除咗谢拉特摩兰奴、柏高艾卡沙、艾比奥尔等土炮外，昔日喺英超搵食嘅祖安科夫、伊天卡普尔、高基连等仍在阵中。而且艾美利亦曾执教过阿仙奴，对英超球队唔陌生，难怪「黄色潜艇」喺上届欧霸两斗阿仙奴及决赛面对曼联，法定时间取得1胜2和，表现绝不失礼。
睇番之前6届欧超杯，除咗2017年皇马以2比1击败曼联外，其余5届法定时间均告打和，明显同季初状态未弗有关，而且喺2015年嗰届西维尔法定时间逼和巴塞隆拿4比4，领军嘅正正就系艾美利，预计维拉利尔今仗有力顶住唔输，受让就更加捧得过，让球客胜有计。
