玩谢意军老人防线 史达宁高速抢胡
讲到英格兰锋线，大多数人都会特别注意队长哈利卡尼，呢位热刺射手今届已射入4球，自然多人关注佢嘅演出，当然包括英军对手意大利，预料「哈神」会受到重点招呼，「首名入球」不妨选择史达宁。
事实上，欧国盃分组赛哈利卡尼未入局时，英格兰就係靠史达宁入波，而且呢位曼城前锋速度快及灵活，面对意大利嘅老人防线容易搵到着数。
睇番决赛双雄近4次交手，英格兰能够入到意大利波嘅球员，如占美华迪、安祖斯唐辛、史杜列治同迪科尔等，都係速度比较快嘅球员，史达宁大有条件喺呢场重要大战率先入波。
淘汰赛冇货交 追恩莫比尼「被换出」
虽然意大利杀入决赛，但欠缺一名稳定嘅数胡人物，领队文仙尼信任3夺意甲神射手嘅恩莫比尼，不过呢位效力拉素嘅前锋，分组赛头两场入波之后，去到淘汰赛阶段，面对强敌就无以为继，特别项目连续3场开出「被换出」。除咗踢法被摸透，恩莫比尼只有1场无关痛痒嘅分组赛获得休息，消耗极大，面对踢法硬淨嘅英格兰未必能有进帐，决赛好大机会再次「被换出」。
