死亡F组大结局

死亡之组最后一轮开波！欧国盃F组第3轮喺周四凌晨同时上演，葡萄牙将喺中立场匈牙利布达佩斯斗法国，德国则于慕尼黑安联球场迎战匈牙利。随住其他组别嘅第3名诞生，法国已率先「逃出生天」，但为争取更好排名，今仗一样唔会放过葡萄牙。另边厢，德国坐拥地利，遇上实力差一截嘅匈牙利，定必狮子搏兔，务求由头赢到尾！

葡萄牙法国联手做细界

F组最后一轮焦点对决，葡萄牙喺中立场斗法国。双方同属欧洲一线球队，因此近年交手战况紧凑，近4次交手全开2球或以下，相信呢场都只会係一球上落，中位数2.5球细盘值博。

随住A至C组嘅赛事完结，乌克兰同芬兰输波，以3分排小组第3，令手执4分嘅法国最少能成为4支「最佳第3名」之一，锁定出线资格。不过，呢支2018年世盃盟主又点会满足于「掹车边」出线，佢哋以世盃冠军班底出战今届欧国盃，包括尼高路简迪同哥伦天杜利素，都係中场十分难缠嘅悍将，可以为后防线筑成坚固屏障。

法国前场名大于实

然而，法国前场依然欠缺入球运，两仗过后只係入到两球，火力同阵中攻击手嘅名气似乎不成正比，基沙文上仗多次出现喺右中场位置，不时仲要肩负埋防守任务，变相削弱佢嘅进攻威胁。

葡萄牙为保住出线希望，今仗对法国必须有分落袋。上仗呢支衞冕之师4度失守不敌德国，为稳阵起见，呢仗踢法势必转趋保守。值得留意係，两军过去6次交手，C朗都惨食白果，其中近4次对碰全开2球或以下，呢场强强相遇必定斗到难分难解，中位数2.5球入球细不容错过。

德国势匈夹狼吼半W

至于「死亡F组」另一场大战，德国喺主场火併匈牙利。德国上仗回勇反胜葡萄牙，士气大振，呢场只要赢波便肯定能以小组头两名出线，主场出击必抢缰，加上近年面对匈牙利常由头赢到尾，半场主胜更可取。

德国首轮因晓姆斯摆乌龙而0比1输畀法国，表现备受抨击，好彩上轮对葡萄牙及时作出调整，将基拿比同夏维斯换位，尤其后者变身中锋更具侵略性，佢射入1球之馀，又成功迫使对手摆乌龙，最终以4比2反胜葡萄牙，重拾信心。

匈牙利焗攻更易失守

虽然匈牙利今届表现出强劲斗心，上仗打和法国1比1，但同有主场之利、近6万球迷支持不无关係。不过呢场有箭头施沙拉尔要扎住上，而且要造访德国，冇咗大量球迷助威，演出随时打折扣。匈牙利两战只得1分，今场务必赢波先仲有出线机会，估计佢哋唔会好似首两轮踢得咁保守，可惜匈牙利后防质素平平，压得太前嘅后果随时会被德国凭锐利反击打爆，话唔定未到半场已经失守。

翻查纪录，双方近4次正面交锋，德国取3胜1负明显格食格，其中3次喺上半场取得领先优势，呢次德军势必喺初段先发制人，半场主胜有计。