瑞典摆铁桶细顶波兰
罗拔佬攻坚欠支援
另一场欧国盃E组尾轮赛事，瑞典于俄罗斯中立场硬撼波兰。瑞典有4分在手已锁定出线权，今场赢波更可以直取首名资格，一定稳打稳扎，波兰为晋级非胜不可，虽然罗拔利云度夫斯基搏到尽，但攻力疲弱乃致命伤，想攻破刻意龟缩嘅瑞典唔易，宁捧2.5球嘅入球细。
波兰头两轮录1和1负只得1分，想出线今仗许胜不许和，不过唔係想赢就赢到，虽然王牌罗拔利云度夫斯基上轮头槌开斋，得以1比1逼和西班牙，但球队整体进攻组织力未见改善。而「罗拔佬」唔单只目标太大，更因队友能力不足，不时要返后策动攻势，无疑浪费咗佢临门一脚能力，变相影响攻力，加上众将唔太适应保罗苏沙嘅战术，令呢位新帅今年上任后7仗赢得1场。
连迪路夫踢国家队特醒
瑞典继首轮死守闷和西班牙后，上轮虽然初段被斯洛伐克控制大局，但总算顶得住，易边后凭科斯贝治操刀12码得手，闷闷哋赢1比0，撇除乌龙波，呢球亦係佢哋近5仗欧国盃决赛周赛事，首个由自己球员攻入嘅士哥，完全反映出守强攻弱嘅特点。值得一提嘅係，瑞典域陀连迪路夫喺英超曼联表现麻麻，不过「国家队版」嘅佢往往判若两人，赛前仲扬言会亲自「招呼」罗拔利云度夫斯基︰「只要有1秒鬆懈，罗拔佬就可以入你波，佢好聪明同好识走位，所以我要100%专注。」
事实上，瑞典向来防守硬淨，近5仗取得4胜1和之馀，仅失1粒，其中4仗开2球或以下，只要佢哋立心死守，以波兰咁疲弱嘅攻力，都好难攻陷佢哋大门，入球细乃不二之选。
