韦斯咸 车仔大驳火
斗抢前4冇得缩
英超今晚有场前列大战，由韦斯咸主场斗车路士，双方都力争3分抢下届欧联入场券。「锤仔帮」韦斯咸近排踢法异常进取，入得又失得，近4场联赛总入球，竟然全达5球或以上，连格呢4场全部有波入。车路士人脚完整唔怕同你斗攻，今场一旦开咗纪录，相信会疯狂入波，首选2.5球入球大。
英超近几年都被球迷谑笑，每逢季尾就出现「让4大战」，无巧不成话，呢两轮亦出现类似情况，车路士同白礼顿互交白卷、韦斯咸2比3不敌纽卡素、利物浦1比1被列斯联逼和、热刺同爱华顿踢成2比2「互相伤害」。
连格近4仗都有入球
韦斯咸现时同第4位嘅车路士同分，只因得失球差不及对方而排第5，「锤仔帮」为打入前4参加下届欧联，今场必把握地利优势抢攻。中场连格自1月尾加盟韦斯咸后，已经射入9球，包括近4仗场场有波入，加上汤马士苏锡克及查洛保云都有不俗入球能力，有力撕开车路士防线。不过韦斯咸虽然近4场联赛合轰11球，攻力强大，但防守亦好脆弱，同时失咗10球，呢4场总入球全部达5球或以上。
车路士领队杜曹上任初期，虽然经常开入球细，但近期表现波动，曾以2比5不敌西布朗，又出现过大胜水晶宫4比1嘅赛果。事实上车仔中前场勐将如云，佢哋攻起上嚟，都有大把方法入波，今场只要其中一边开纪录，另一队就冇得缩焗攻，建议事前买定个2.5球大睇波，只要入波一出现，睇啱时机走地可以追多两注入球大。
