罗拔佬避战火力锐减 拜仁斗PSG半场和最稳
周四凌晨欧联8强首回合上演去届决赛翻版，拜仁慕尼黑主场斗巴黎圣日耳门（PSG）。拜仁上届决赛赢波捧盃，不过今次再唔同嘅係，王牌射手罗拔利云度夫斯基因伤缺阵，冇咗佢攻力减半，至于PSG已改由普捷天奴领军，今届4场欧联作客全开半场和，佢哋唔介意和住先，宜追半场和。
拜仁慕尼黑近两届于欧联无敌，近19场欧联取得18胜1和，包括上届决赛1比0击败PSG，不过罗拔佬早前于世盃外受伤，要休战1个月，除今仗肯定缺阵，下周次回合亦无法披甲，对这支衞冕盟主进攻造成严重打击，上场联赛榜首大战以1比0小胜RB莱比锡都算好彩，但过程绝不轻鬆。
事实上，拜仁上届决赛赢波过程绝非一面倒，全靠京士利高文下半场把握一次机会才奠定胜局，双方实力相距不远，今次缺少罗拔佬情况下，想抢攻都唔係咁易。
PSG 3大中场缺阵
PSG上场于法甲榜首大战对里尔输0比1，尼马攞红牌，可以专心打欧联；至于意大利中场马高华拉堤确诊新冠肺炎需接受隔离，而今季新加盟、表现获好评嘅葡萄牙国脚丹尼路佩尼拿则有伤在身，加上阿根廷中场里安度柏利迪斯坐波监，一口气失去中场3大主力，PSG更加唔会冒险抢攻。
PSG今季客场出战欧联踢法较保守，无论对手係实力平平嘅巴沙克舒希，或5届欧联盟主巴塞隆拿，全部开半场和，而且上届决赛半场都係踢成0比0，呢个半场和走唔甩。
