17连胜强势揿唔住

今晚英超重头大战，阿仙奴主场硬撼1哥曼城。「蓝月亮」曼城各项赛事合计豪取17连胜，弗到漏油，最恐怖係主帅哥迪奥拿派出任何一位球员上阵都照赢，顺到冇朋友，依家连奇云迪布尼同阿古路都伤愈可以候命，加上近10次碰头，曼城赢咗9次，摆明食住「兵工厂」，今场客胜热得有道理。

曼城自上年12月中击败修咸顿后，各项赛事合计连赢17仗，继续刷新英格兰球队于顶级联赛最长连胜纪录，就算2月硬仗连场仍然保持托弗状态，连挫利物浦、热刺同爱华顿。未计今轮赛事，「蓝月亮」以10分甩开次席曼联，夺标机会高唱入云，难怪足智彩曼城冠军赔率热到爆灯，众将定必希望喺阿仙奴身上全取3分，将优势进一步扩大。

球员托弗点变阵都得

「蓝月亮」最恐怖嘅地方，就係主帅哥迪奥拿用任何一位球员都即刻入局，鲁宾戴亚斯加盟后确实令防线巩固，但佢近期不时因病缺阵，改用拿朴迪拍住史东斯又冇乜甩漏，祖奥简斯路无论出任左、右闸一样出色，同时史达宁及菲尔科顿频有进帐，将前锋阿古路及加比尔捷西斯因伤缺阵嘅影响减到最低。「耶稣仔」早前已经复出，阿古路近日同奇云迪布尼亦伤愈，呢位阿根廷箭头之前11次对阿仙奴攻入8粒，由于曼城嚟紧周中要出战欧联16强首回合对慕逊加柏，唔排除会轮换畀「阿古兽」上阵，佢对「兵工厂」嚟讲绝对係极大威胁。

跌Watt阿仙奴体力输蚀

阿仙奴近4场联赛仅1胜，所赢只係有前冇后嘅列斯联，更喺领先4球下，被对手连追两球，最终虽赢4比2，但反映出防守唔够集中嘅问题仍然存在。而且「兵工厂」上周中于欧霸32强首回合恶战宾菲加打和1比1，奥巴美扬屡失良机令佢哋未能赢波，嗰场喺中立场罗马上演，令阿仙奴比周中留喺英国出战联赛嘅曼城少1日休息，体力输蚀。翻查纪录，双方各项赛事近10次对垒，曼城豪取9胜1负，单计联赛更7连胜，明显食住「兵工厂」，今仗有力乘胜追击。