恶客维拉恰到西布朗
西布朗（左）易帅后成效难料。
周一凌晨英超上演「西米德兰兹郡打吡」，西布朗主场迎战阿士东维拉。深陷降班区嘅西布朗，搵嚟「大Sam」艾拿戴斯执起球队教鞭，顶替啱啱被炒嘅比历。经历主帅调动，一时三刻要适应绝对冇咁易，今场仲要遇上作客特别醒嘅维拉，随时凶多吉少，捧番客胜好过。
西布朗上场虽然作客以1比1逼和强敌曼城，但呢场战果唔足以帮比历保住饭碗，这位带领西布朗重返英超嘅前克罗地亚国家队主帅，赛后惨食无情鸡，由「大Sam」艾拿戴斯接过教鞭。「大Sam」过往曾执教保顿、韦斯咸、新特兰等球队，尤其处理护级任务係有一手，不过佢2018年同前东家爱华顿分手后，超过两年一直赋閒在家，佢仲有冇魄力带领球队走出困境，依然係未知之数。
大Sam刚掌帅成效难料
西布朗以7分深陷积分榜尾二，联赛至今赢得1场，攻守两端都存在问题，球会高层认为要喺季中及时止血，推倒重来，未必係坏事，不过要班波即刻适应一套全新战术并唔容易，「大Sam」要为西布朗搵番胜利方程式，都需要一段时间。
况且上季仅仅护级嘅阿士东维拉，今季脱胎换骨，尤其作客发挥优异，近5场取4胜1负，包括赢过李斯特城同阿仙奴，而且4场胜仗都成功保住清白身，表现极具说服力，呢场巴西中场杜格拉斯雷斯坐完波监复出，维拉阵容更加完整，有本钱喺呢场打吡战旗开得胜。
