哥帅解释英超0换人原因
曼城领队哥迪奥拿同利物浦主帅高普，成日叫英超恢复「每场换5人」，强调咁样可保护球员免因过劳而受伤。不过曼城上场对富咸嘅联赛，11位正选由头踢到尾，令人质疑哥帅讲一套做一套。佢日前就解释话唔换人係同今晚欧联主场对马赛有关：「我想对富咸畀球员踢足90分钟，欧联就用另一班人，之后决定嚟紧对曼联嘅打吡用咩球员最适合。」曼城喺C组已锁定首名，上场冇落场嘅贝拿度施华、菲尔科顿及费伦托利斯等预料今晚会正选披甲。
查维马天尼斯下年先复出
拜仁慕尼黑防中查维马天尼斯上场德甲对RB莱比锡伤出，据德国媒体《踢球者》报道，呢位32岁西班牙国脚大腿肌肉撕裂，今年都唔会出场。拜仁今年得番4场波，包括今晚欧联A组分组赛主场对莫斯科火车头，好在佢哋已经提早获小组首名，查维马天尼斯缺阵影响唔大。另外左闸卢卡斯靴南迪斯及中场哥伦天杜利素继续养伤，新星艾方素戴维斯可望复出。
