首都打吡撼1哥
今晚西甲爆发首都打吡，由衞冕嘅皇家马德里主场硬撼1哥马德里体育会。「银河舰队」队长沙治奥拉莫斯伤愈复出，有助巩固防守，不过马体会防线固若金汤，造访同市死敌必定稳中求胜，加上近年联赛碰头半场经常冇交收，半场和更好路。
两队喺周中欧联为争出线都要冇得留力，皇马、马体会分别向慕逊加柏及萨尔斯堡赠送两隻光蛋，双双出线但难免有疲态。皇马早前喺队长沙治奥拉莫斯因伤缺阵下，防线乱过乱世佳人，搞到频频失分，近4场联赛只得1胜1和2负，多个失波都同后衞及门将泰拔高图尔斯「送礼」有关。好彩「沙拉」及时康复，虽然呢位34岁队长速度不如前，但胜在经验丰富路数多，有这支「定海神针」殿后包抄执漏，确可稳住防线军心。
马体会防线滴水不漏
马德里体育会依家位居榜首，全靠滴水不漏嘅防守，主帅施蒙尼近期改用352阵式，以钢门奥比历、中坚荷西基文尼斯为首嘅3人防线，配合佐治高基、马高斯洛兰迪等中场屏障，今季10场联赛只係失咗2粒咁大把，失球之少冠绝欧洲5大联赛，凭住呢条铜牆铁壁，今遇同市死敌一定照打稳守突击。
睇番双方近7次联赛交手，皇家马德里取得2胜5和，其中6次半场互交白卷，睇得出大家都唔想过早失波陷于被动，喺比赛初段都稳打稳扎，半场和值得再追。
