匈牙利箭头 施沙拉尔
欧国附A组决赛，匈牙利主场斗冰岛；上届欧国盃8强分子冰岛表现今非昔比，而且佢哋向来靠主场搵食，离开自己地头恶唔出样；匈牙利近5场国际赛3胜1和1负，加上近6次对冰岛5胜1和，无论状态、往绩皆佔上风，主场出击可睇高一线。
冰岛作客脚软
今场两支主角都係上届欧国盃决赛周分子，冰岛更加爆冷杀入8强。不过自从实力曝光后，踢法实而不华嘅冰岛想再偷鸡赢波已经唔容易，佢哋近两届欧国联8场分组赛全部输晒，成绩大倒退，而且欧国盃外围赛5场作客只係赢过弱旅安道尔及摩尔多瓦，对住实力平平嘅阿尔巴尼亚都输2比4，好彩佢哋上圈抽中主场出击，仲有效力爱华顿嘅中场基菲尔施古臣突然发威攻入两球，先至惊险踢走罗马尼亚，今场轮到冰岛作客出击，实在唔好高估。
世界排名47嘅匈牙利上圈作客3比1击败保加利亚，而且近两场欧国联先后击败实力唔差嘅塞尔维亚及打和俄罗斯，两场比赛都冇失波，无论攻守都有稳定发挥。效力缅恩斯嘅施沙拉尔係匈牙利入球泉源，佢为国家队披甲66场攻入21球，今场担正攻坚，为抢得决赛周入场券，一定加倍肉紧。匈牙利近6次国际赛斗冰岛5胜1和未输过，当中3次主场出击全部赢晒，有地利之助值得睇好。
