恶客曼联上盘抵玩
今晚续演欧联第3轮分组赛，头场H组曼联作客斗土耳其代表巴沙克舒希。虽然「红魔」啱啱喺联赛主场输畀阿仙奴，不过佢哋头2轮分组赛全胜，而且今季于各项赛事作客累积5连胜；巴沙克舒希头2轮共吞4蛋，实力唔够班，曼联让一球/球半照捧上盘。
曼联上场联赛以0比1不敌阿仙奴，今季4场主场联赛仲未开斋，造出球会自1972/73球季后联赛主场最差开季成绩，依家无论球员抑或领队苏斯克查都饱受批评，唔想再衰更要打醒十二分精神。
巴沙克舒希连续2轮吞蛋
曼联今届头2轮分组赛赢晒，先后杀败两大强敌巴黎圣日耳门同RB莱比锡，而且佢哋今季各项赛事5场作客全胜，离开主场发挥仲好。喺英超坐波监嘅法国前锋安东尼马迪尔今仗可复任正选，唔使拉舒福特喺前线孤军作战，对「红魔」嚟讲绝对係好消息。
巴沙克舒希创会至今只有30年历史，自从2014/15球季易主后成绩先全面起飞，对上6季联赛排名从未跌出前4，上季更历史性首夺土超冠军，不过讲到欧洲赛战绩，巴沙克舒希明显只係「初级班」，之前2次出战欧联都喺外围赛出局，今届以冠军身份直入分组赛，头2轮对圣日耳门同莱比锡都输0比2，后防主力包括头2轮正选上阵嘅前利物浦中坚史卡迪尔、曾效力曼联嘅巴西守衞拉菲尔达施华俱高峰已过，对住当时得令嘅曼联自然处下风，1.33倍客W固然稳阵，求好分可博曼联上盘。
