基辅作客巴塞随时延期
9件确诊13个缺阵
欧联G组巴塞隆拿今晚会喺主场迎战乌克兰代表基辅戴拿模，不过基辅赛前爆出有13人将会缺席今场关键战，当中有9个球员确诊新冠肺炎，如果再有一人未能出战，呢场比赛就有可能延期。
多1个避战即踢唔成
据指基辅上周末已经有3名球员嘅检测呈阳性，当中包括两位主力龙门，令佢哋喺联赛已经要用18岁嘅年轻门将纳舒特，跟住本周初基辅再有6名球员「中招」，令确诊球员人数增至9人，加上3人受伤及1人停赛，基辅已有13人无法出发去鲁营对战巴塞。
目前基辅仅有欧联最低标准嘅13人可以出战，换言之，只要多1个人确诊，呢场比赛就要改期，就算最终如期举行，基辅冇咗半队精兵，对巴塞嚟讲肯定係好消息，美斯亦有机会入波攞威，呢位球王今季目前为止，喺巴塞同国家队比赛只係入咗4球，而且全部都係12码。
