费城联主场威力劲够赢冲击
听朝美职东岸对决，费城联主场迎战蒙特利尔冲击。费城联今季攻守兼备，成为战绩冒升嘅关键，而且专靠主场搵食，撞正由法国名宿亨利揸旗、踢法有前冇后嘅冲击，实食冇黐牙，主胜有计。
费城联阵中冇乜球星，但胜在整体战出色，依家无论喺东岸同总排名，都位居次席，仅次于FC多伦多，关键係做到攻守兼备。费城联今季联赛暂时入咗28粒，攻击点够晒分散，冇话倚赖边个数胡，派斯比高、沙治奥山度士、安东尼方坦拿、班顿艾朗臣轮流发威，令对手难于防范，更重要係防守够硬淨，至今只係失咗13粒，係其中1支失波第2少嘅球队，加上佢哋今季6次主场全部赢晒，係联赛唯一主场全胜球队，极具威力。
亨利教波唔识守
暂时喺东岸排第8嘅蒙特利尔冲击，今季喺法国名宿亨利接手下，继续踢性感足球，单睇佢哋入24球、失30球嘅数字，就知班波几有娱乐性喇，可惜挂住进攻无助战绩，近6仗联赛只得1胜1和4负。加上双方近4次碰头，费城联赢咗3场，今仗有埋主场之利，再赢冲击冇难度。
